२८ साउन, बुटवल । लुम्बिनी प्रदेशको मुख्यमन्त्रीमा माओवादी केन्द्रका नेता कुलप्रसाद केसी नियुक्त भएका छन् । प्रदेश प्रमुख अमिक शेरचनले बिहीबार अपराह्न केसीलाई मुख्यमन्त्री नियुक्त गरेका हुन् । केसी लुम्बिनी प्रदेशको माओवादी केन्द्र संसदीय दलका नेता हुन् ।
एमाले नेता शंकर पोखरेलले बुधबार पदबाट राजीनामा दिएपछि केसीले बिहीबार बहुमत प्रदेशसभा सदस्यहरुको हस्ताक्षरसहित मुख्यमन्त्रीमा दाबी प्रस्तुत गरेका थिए । नेपाली कांग्रेस, माओवादी केन्द्र, जसपा र राष्ट्रिय जनमोर्चाको गठबन्धनले यसअघि पोखरेलविरुद्ध अविश्वास प्रस्ताव दर्ता गर्दै केसीलाई नयाँ मुख्यमन्त्री प्रस्ताव गरेको थियो ।
गठबन्धनका मुख्य घटक कांग्रेस र माओवादीबीच आठ–आठ महिना सरकारको नेतृत्व गर्ने सहमति भएअनुसार पहिलो चरणमा केसी मुख्यमन्त्री बनेका छन् । त्यसपछि कांग्रेसले लुम्बिनी प्रदेश सरकारको नेतृत्व गर्ने छ ।
यो पनि पढ्नुहोस्–
कुलप्रसाद केसी: गिरिजालाई कालोझण्डा देखाउँदा जागिर गुमाए, कांग्रेसकै समर्थनमा मुख्यमन्त्री बने
