काठमाडौं- काठमाडौं महानरगपालिका-१० बुद्धनगरस्थित ईन्द्रेणी कमप्लेक्सको छैठौं तलामा रहेको शम्भु श्रेष्ठले संचालन गरेको ईन्द्रेणी फिटनेसभित्र इन्भर्टर सर्ट भई सोमबार साँझ आगलागी हुँदा करिब ३ करोड रुपैयाँ बराबरको धनमाल जलेर नष्ट भएको छ । आगलागी भएको भन्ने खबर प्राप्त हुनासाथ महानगरीय प्रहरी वृत्त नयाँबानेश्वर र सिंहदरबार, नगर प्रहरी, नेपाली सेना, सशस्त्र प्रहरी वल नेपाल समेतबाट खटिएको टोली एवं काठमाडौं, भक्तपुर र ललितपुर तथा नेपाली सेनाको बरुण यन्त्र ४ वटा र काठमाडौं महानगरपालिकाको पानी ट्याङ्कर समेतको सहयोगमा आगलागी नियन्त्रणमा लिइएको थियो ।
झापा दमक नगरपालिका-३ स्थित शरणार्थी शिविर बस्ने रोहित महतको घरमा सोमबार दिउँसो आगलागी हुँदा घर, नगद ५ लाख ५० हजार रुपैयाँ जलेर करिब ९ लाख रुपैयाँ बराबरको धनमाल नष्ट भएको छ । आगलागी भएको भन्ने खबर प्राप्त हुनासाथ प्रहरी चौकी बाघखोरबाट खटिएको प्रहरीले दमकल, सशस्र प्रहरी बल नेपाल र स्थानीय बासिन्दाको सहयोगमा आगलागी नियन्त्रणमा लिएको छ ।
मोरङ धनपालथान गाउँपालिका-४ हरकपुर बस्ने ५२ वर्षीय जगदिश मण्डलले संचालन गरेको तारा कृषि फर्ममा करेन्ट सर्ट भई सोमबार राति आगलागी हुँदा कुखुराको दानाचारो, १० वटा पंखा, ५ सय वटा ठुला कुखुरा र ५ सय वटा साना चल्ला समेत जलेर करिब.८ लाख रुपैयाँ बराबरको धनमाल नष्ट भएको छ ।
अर्घाखाँची सितगंगा नगरपालिका-८ पाकुरी बस्ने बनिलाल बुढामगरको गोठमा सोमबार साँझ आगलागी हुँदा घर, गोठ र ५ चौपाय समेत जलेर करिब १३ लाख रुपैयाँ बराबराको धनमाल नष्ट भएको छ ।
