काठमाडौं- सिरहा, धनुषा, बाँके, सोलुखुम्बु र रुपन्देहीका छुट्टाछुट्टै स्थानमा भएका सवारी दुर्घटनामा परी ७ जनाको मृत्यु भएको छ ।
सिरहा लहान नगरपालिका-३ स्थित भित्री सडकमा स.१ क २६१ नम्बरको टिपरले प्रदेश २-०१-००२ प २६८२ नम्बरको मोटरसाइकललाई बिहीबार दिउँसो ठक्कर दिँदा उक्त मोटरसाइकलमा सवार ३ जनाको मृत्यु भएको छ । दुर्घटनामा मोटरसाइकल चालक सप्तरी बलान बिहुल गाउँपालिका-२ दिगियाँ बस्ने ३० वर्षीय राम कुमार यादव, मोटरसाइकलमा सवार सोही ठाउँ बस्ने अन्दाजी ८ वर्षीय अभिषेक यादव र ७० वर्षीय मोतिलाल यादवको मृत्यु भएको हो । गम्भीर घाइते भएका उनीहरुको माँ-धमनी अस्पताल र कामान अस्पताल लहान हुँदै थप उपचारको लागि नोबेल अस्पताल बिराटनगर लैजाने क्रममा १ जनाको बाटोमै र अन्य २ जनाको उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ । हाल फरार टिपर चालकको प्रहरीले खोजी गरिरहेको छ ।
धनुषा मिथिला नगरपालिका-१० लालगढस्थित सडकमा ना.६ ख २५५९ नम्बरको बस र बा.४९ प ६८८९ नम्बरको मोटरसाइकल बिहीबार दिउँसो एकआपसमा ठक्कर खाँदा मोटरसाइकल चालक उदयपुर कटारी नगरपालिका-७ बस्ने २७ वर्षीय विकाश विकको घटनास्थलमै मृत्यु भएको छ । बस चालकलाई प्रहरीले नियन्त्रणमा लिएको छ ।
बाँके खजुरा गाउँपालिका-५ धनौली बजार नजिक सडकमा भे.१ ख ३३६० नम्बरको हाईसले भे.३ प ५३६९ नम्बरको मोटरसाइकललाई बिहीबार राति ठक्कर दिँदा मोटरसाइकल चालक कञ्चनपुर दोधारा-१ बस्ने ३० वर्षीय दिनेश बरालको मृत्यु भएको छ । दुर्घटनामा गम्भीर घाइते भएका उनको भेरी अस्पताल नेपालगंजमा उपचारको क्रममा मृत्यु भएको हो । हाईस चालकलाई प्रहरीले नियन्त्रणमा लिएको छ ।
सोलुखुम्बु लिखुपिके गाउँपालिका-५ टुमाल भन्ने स्थानमा ना.७ ख ४५६४ नम्बरको टिपर सडकबाट अन्दाजी २ सय मिटर तल लिखु खोलामा खसेर बिहीबार राति दुर्घटना हुँदा टिपर चालक सोही ठाउँ डेरा गरी बस्ने ४५ वर्षीय जित बहादुर थिंङको मृत्यु भएको छ । उक्त टिपर दुर्घटना भएको र चालक फेला नपरेको भन्ने खबर प्राप्त हुनासाथ प्रहरी चौकी किन्जाबाट खटिएको प्रहरीले खोजी गर्ने क्रममा चालकको शव फेला परेको हो ।
रुपन्देही बुटवल उपमहानगरपालिका-५ तिनाउँ पुलस्थित सडकमा लु.२ ख ४९६६ नम्बरको टिपरले लु.४४ प १६११ नम्बरको स्कुटरलाई बिहीबार राति ठक्कर दिँदा स्कुटरमा सवार सर्लाही कडेना गाउँपालिका-६ बस्ने १७ वर्षीय आकाश पटेलको मृत्यु भएको छ । दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । दुवै सवारी साधनका चालकलाई प्रहरीले नियन्त्रणमा लिएको छ ।
