काठमाडौं- यस वर्षको ‘विजयबाबु स्मृति पत्रकारिता पुरस्कार’ वरिष्ठ पत्रकार केशवप्रसाद पौडेललाई प्रदान गरिएको छ । ०४२ सालदेखि पत्रकारितामा सक्रिय पौडेललाई शुक्रबार सो पुरस्कार हस्तान्तरण गरिएको हो ।
नेपाल समाचार केन्द्र प्रालिद्वारा स्थापित सो पुरस्कारको राशि सम्मान पत्रसहित नगद ३४ हजार छ । नेपालमा आर्थिक पत्रकारिताको जग बसाल्न महत्त्वपूर्ण भूमिका वहन गरेका स्वर्गीय पत्रकार विजयबाबु खत्रीको स्मृतिमा ०७५ सालमा केन्द्रले पुरस्कार स्थापना गरेको हो । खत्रीको दशौं स्मृति दिवसको अवसरमा पौडेललाई सो पुरस्कार प्रदान गरिने घोषणा गरिएको थियो ।
पौडेल न्यु स्पटलाइट पाक्षिक म्यागजिनका प्रकाशक र सम्पादक हुन् । काठमाडौं–३२ कोटेश्वरका स्थायी बासिन्दा उनी सन् २००६ मा ‘डेभलपिङ एसिया जर्नालिजम अवार्ड’बाट सम्मानित भएका थिए ।
आर्थिक पत्रकारितामा सक्रिय रहँदारहँदै १२ मंसिर ०६८ मा रुपन्देहीको सालझन्डीमा भएको सडक दुर्घटनामा परी ३४ वर्षको उमेरमा विजयबाबु खत्रीको निधन भएको थियो । स्वर्गीय खत्रीको स्मृतिमा उनकी पत्नी लक्ष्मी श्रेष्ठ खत्रीले १२ मंसिर ०७५ मा अक्षय कोष स्थापना गरेकी हुन् । सोही अक्षय कोषमार्फत केन्द्रले हरेक वर्ष पुरस्कार प्रदान गर्दै आएको छ । विजयबाबु पत्रकारिता पुरस्कारबाट पहिलो वर्ष ध्रुवहरि अधिकारी र दोस्रो वर्ष स्वर्गीय गोकर्ण गौतम पुरस्कृत भएका थिए ।
