काठमाडौं- ताप्लेजुङ, कञ्चनपुर, पाल्पा, महोत्तरी, पर्वत, पर्सा र सुनसरीका छुट्टाछुट्टै स्थानमा भएका सवारी दुर्घटनामा परी १० जनाको मृत्यु भएको छ।
ताप्लेजुङ सिरिजंघा गाउँपालिका–३ बोखिमस्थित सडकमा ओरक्पाबाट कुन्जरीतर्फ जाँदै गरेको मे१त ६८९३ नम्बरको ट्याक्टर सडकबाट अन्दाजी २ सय मिटर तल खसेर शुक्रबार दिउँसो दुर्घटना हुँदा त्यसमा सवार सोही ठाउँका २५ वर्षीय वसन्त लिम्बु र १५ वर्षीय समिर लिम्बुको मृत्यु भएको छ । दुर्घटनामा गम्भीर घाइते भएका वसन्तको धरान घोपा र समिरको प्राथमिक स्वास्थ्य केन्द्र तेल्लोकमा उपचारको क्रममा मृत्यु भएको हो । दुर्घटनामा घाइते भएका ट्याक्टर चालकसमेत २ जनाको धरान घोपामा उपचार भइरहेको छ ।
कञ्चनपुर शुक्लाफाँटा नगरपालिका–५ शुक्लाफाँटा राष्ट्रिय निकुञ्जस्थित सडकमा से१त ३८४१ नम्बरको ट्याक्टर आफैं अनियन्त्रित भई शुक्रबार दिउँसो दुर्घटना हुँदा ट्याक्टरमा सवार कृष्णपुर नगरपालिका–९ बस्ने ६५ वर्षीया द्रोपती रानासहित ३ जनाको मृत्यु भएको छ । दुर्घटनामा गम्भीर घाइते भएका उनीहरूको सेती प्रादेशिक अस्पताल धनगढीमा उपचारको क्रममा मृत्यु भएको हो । दुर्घटनामा घाइते भएका ३ जनाको निसर्ग अस्पताल धनगढी र ३ जनाको केजी अस्पताल धनगढीमा उपचार भइरहेको छ भने ६ जना उपचारपछि डिस्चार्ज भएका छन ।
पाल्पा तानसेन नगरपालिका–९ दमकडास्थित सडकमा लु४त ५४३८ नम्बरको ट्याक्टर शुक्रबार साँझ दुर्घटना हुँदा ट्याक्टरका साहु सोही ठाउँ बस्ने ४१ वर्षीय दीपक ढकालको मृत्यु भएको छ । दुर्घटनामा गम्भीर घाइते भएका उनको लुम्बिनी मेडिकल कलेज प्रभास पाल्पामा उपचारको क्रममा मृत्यु भएको हो । दुर्घटनामा घाइते भएका ट्याक्टरका सह–चालकको सोही अस्पतालमा उपचार भइरहेको छ ।
महोत्तरी पिपरा गाउँपालिका–६ रतौलीस्थित सडकमा प्र.२–०२–००१ प ३८५८ नम्बरको मोटरसाइकल आफैँ अनियन्त्रित भई शुक्रबार राति दुर्घटना हुँदा मोटरसाइकल चालक धनुषा वैदेही नगरपालिका–८ बस्ने २० वर्षीय बलिराम साहको घटनास्थलमै मृत्यु भएको छ ।
पर्वत कुश्मा नगरपालिका–८ परादीस्थित सडकमा काठमाडौंबाट बागलुङतर्फ जाँदै गरेको ग२ख ००९८ नम्बरको बसले ग२त ६४२७ नम्बरको ट्याक्टरलाई शनिबार बिहान ठक्कर दिँदा ट्याक्टरमा सवार उदयपुर चौदण्डीगढी नगरपालिका–२ बस्ने १८ वर्षीय विशाल लामिछानेको घटनास्थलमै मृत्यु भएको छ । दुर्घटनामा घाइते भएका ट्याक्टरमा सवारमध्ये १८ जनालाई जिल्ला अस्पताल र ५ जनालाई गण्डकी अस्पताल पोखरातर्फ उपचारको लागि पठाइएको छ । दुवै चालक र सवारी साधनलाई प्रहरीले नियन्त्रणमा लिएको छ ।
पर्सा पटेर्वासुगौली गाउँपालिका–२ स्थित सडकमा ना५त ४१०८ नम्बरको ट्याक्टरको चक्का बिग्रिन गई जग लगाई तान्ने क्रममा जग फुत्किँदा ट्याक्टरको धुराले च्यापिएर ट्याक्टर चालक सोही ठाउँ बस्ने ३५ वर्षीय साविर खान पौठानको शनिबार बिहान घटनास्थलमै मृत्यु भएको छ ।
सुनसरी कोशी गाउँपालिका–८ भाण्टाबारीस्थित सडकमा को१ख ४९८८ नम्बरको बसले को१ख ६३७५ नम्बरको ट्रकलाई शनिबार दिउँसो ठक्कर दिई बस अनियन्त्रित भई दुर्घटना हुँदा बसमा सवार हाल नाम, थर, वतन नखुलेका एकजनाको मृत्यु भएको छ । दुर्घटनामा गम्भीर घाइते भएका उनको जिल्ला अस्पताल इनरुवामा उपचारको क्रममा मृत्यु भएको हो । दुर्घटनामा घाइते भएका बसमा सवार अन्य २२ जनाको सोही अस्पतालमा उपचार भइरहेको छ ।
