काठमाडौं- एसीसी प्रिमियर लिग शुरु हुन अब एक साता बाँकी छ। नेपाली क्रिकेट खेलाडी र क्रिकेट प्रेमीको ध्यान अहिले प्रिमियर लिगमै केन्द्रित छ। लिगका लागि नेपाली राष्ट्रिय क्रिकेट टोलीले तयारी पनि तीव्र पारेका छन्।
टोलीले हाल त्रिवि क्रिकेट मैदानमा अभ्यास गरिरहेको छ। प्रतियोगिता ५ वैशाखदेखि शुरु हुँदैछ। खेल १८ वैशाखसम्म चल्नेछ। खेल त्रिवि क्रिकेट मैदान र मुलपानी मैदानमा हुनेछ।
नेपालमा हुने एसीसी प्रिमियर कपमा १० टोलीलाई दुई समूहमा विभाजन गरिएको छ। समूह ‘ए’मा नेपालसहित ओमन, कतार, मलेसिया र साउदी अरेबिया छन् भने समूह ‘बी’मा यूएई, हङकङ, कुवेत, सिंगापुर र बहराइन छन्।
यस प्रतियोगितालाई ‘रोड टु एसिया कप’को रूपमा हेरिएको छ। प्रतियोगिताको विजेताले एसिया कपमा स्थान बनाउने छ।
एसीसी प्रिमियर लिग जिते के हुन्छ?
नेपाली क्रिकेट टोली अहिले उत्कृष्ट फर्ममा छ। किनकि, भर्खरै सम्पन्न विश्वकप लिग-२ मा उत्कृष्ट प्रदर्शन गर्दै विश्वकप छनोटमा सीधै छनोट हुन सफल भयो, नेपाली टोली। लिग-२ का पछिल्ला १२ खेलमध्ये ११ मा जित निकाल्दै नेपाली क्रिकेट टोलीले सनसनी नै मच्चायो। एकदिवसीय मान्यता नै धौधौ परेको अवस्थामा लिग-२ को शीर्ष ३ मा पर्न सफल भयो। नेपाली क्रिकेटको यो छलाङमा प्रशिक्षक मोन्टी देशाईंको ठूलो हात छ। नयाँ प्रशिक्षकका रूपमा उनी नियुक्त भएसँगै जे भयो त्यो चमत्कारसरह नै भएको मान्नेहरू पनि धेरै छन्।
किनकि, कप्तान ज्ञानेन्द्र मल्लको तलबका विषयमा शुरु भएको द्वन्द्व, त्यसलाई निस्तेज गर्न क्यानद्वारा सन्दीप लामिछानेलाई कप्तानीको जिम्मेवारी अनि लामिछानेमाथि नाबालिग बलात्कारको मुद्दा, क्यानले आयोजना गरेको अति विवादास्पद नेपाल टी-२० फ्रेन्चाइज क्रिकेट, स्पट फिक्सिङ र म्याच फिक्सिङ काण्ड, पारिश्रमिकविहीन बनेका खेलाडीजस्ता अनेक काण्डका बेला आएका प्रशिक्षक देशाईंले गज्जबकै नतिजा दिलाएका छन्।
उनी प्रशिक्षकको रूपमा नियुक्त भएको धेरै भएको छैन। २२ माघदेखि मात्र प्रशिक्षण दिन शुरु गरेका देशाईंले अप्रत्यासित नतिजा हात पार्न सफल भएका छन्। उनकै प्रशिक्षणमा नेपाली क्रिकेट टोली फेरि एकपटक मैदान उत्रँदै छ।
उत्कृष्ट फर्ममा रहेको नेपालले फेरि एउटा ठूलो अवसर पाएको छ। यदि यो अवसरमा सफल भए नेपालले शक्तिशाली टेस्ट राष्ट्रहरूसँग प्रतिस्पर्धाको अवसर पाउनेछ।
यो प्रतियोगितामा च्याम्पियन बन्न सके नेपालका लागि एसिया कपको ढोका खुल्नेछ। र, शीर्ष ३ मा परे एसिया इमर्जिङ कपमा पुग्नेछ। इमर्जिङ टिम एसिया कपमा भारत ए, पाकिस्तान ए, श्रीलंका ए, अफगानिस्तान ए र बंगलादेशको ए टोली हुनेछन्।
के हो इमर्जिङ एसिया कप ?
यो एसियन क्रिकेट परिषद् (एसीसी)ले आयोजना गर्ने एक प्रतियोगिता हो। एसियाका टेस्ट मान्यताप्राप्त ५ राष्ट्रका यू-२३ टोली र पछिल्लो एसिया कप छनोट प्रतियोगितामा गरेको प्रदर्शनका आधारमा शीर्ष तीन राष्ट्रका राष्ट्रिय टोली प्रतियोगितामा सहभागी हुनेछन्।
यो इमर्जिङ टिम एसिया कपको यो पाँचौं संस्करण हो। यसअघि नेपालले सन् २०१३ को पहिलो, २०१७ मा भएको दोस्रो र २०२० मा भएको तेस्रो संस्करणमा पनि भाग लिएको थियो। तर, उत्कृष्ट प्रदर्शन गर्न सकेको थिएन।
अभ्यास खेल खेल्दै
नेपालले हेभिवेट मानिएका टोलीहरूसँग प्रतिस्पर्धा गर्ने निश्चित भइरहँदा आफ्नो लयलाई निरन्तरता दिने चुनौती पनि थपिएको छ। नेपाली टोलीका प्रशिक्षक देशाईंले प्रिमियर कपको तयारीस्वरूप खेलाडीहरूलाई प्रशिक्षण दिइरहेका छन्।
प्रिमियर कपअघि नै नेपालले केही अभ्यास खेलहरू खेल्ने भएको छ। नेपालले ओमान र बहराइनसँग अभ्यास खेल खेल्ने भएको क्यानले जनाएको छ।
३० चैत (१३ अप्रिल) मा बहराइनसँग अभ्यास खेल खेल्नेछ। त्यपछि ओमानले नेपालसँग २ वैशाख (१५ अप्रिल) मा अभ्यास खेल खेल्नेछ। खेल मुलपानी वा टीयूमध्ये कहाँ खेल्ने भन्ने पक्का नभइसकेको क्यानले जनाएको छ।
को-को छन् टोलीमा?
एसीसी प्रिमियर कपका लागि २१ सदस्यीय प्रारम्भिक टोली हाल प्रशिक्षणमा छ। क्यानले प्रतियोगिताका लागि यसअघि नै प्रारम्भिक टोली घोषणा गरिसकेको छ।
प्रारम्भिक टोलीका सदस्यमा ज्ञानेन्द्र मल्ल, आरिफ शेख, कुशल भुर्तेल, भीम सार्की, आसिफ शेख, प्रतिष जीसी, ललित राजवंशी, रोहित पौडेल र सन्दीप जोरा छन्।
यस्तै, सोमपाल कामी, किशोर महतो, कुशल मल्ल, श्याम ढकाल, कमलसिंह ऐरी, सन्दीप लामिछाने, दीपेन्द्रसिंह ऐरी, अर्जुन साउद, गुलशन झा, सूर्य तामाङ, करण केसी र देव खनाल छन्।
खेलतालिका
