नयाँदिल्ली- भारतमा कोभिड-१९ संक्रमितको संख्या आइतबारसम्म तीन करोड २४ लाख २४ हजार २३४ पुगेको संघीय स्वास्थ्य मन्त्रालयको पछिल्लो तथ्यांकले देखाएको छ।
भारतभर विगत २४ घण्टाको समयमा ३० हजार ९४८ थप व्यक्तिमा संक्रमण पुष्टि भएको छ। साथै शनिबार बिहानदेखि २४ घण्टाको अन्तरालमा कोभिड-१९ संक्रमित थप ४०३ जनाको मृत्यु भएको छ। यससँगै भारतमा मृत्यु हुने संक्रमितको संख्या चार लाख ३४ हजार ३६७ पुगेको छ।
विगत २४ घण्टाको अवधिमा अघिल्लो दिनभन्दा सात हजार ९४२ कोभिड–१९ संक्रमित थपिएका छन् भने संक्रमित रहेको कूल व्यक्तिको संख्या अझै तीन ५३ हजार ३९८ छ।
भारतमा पछिल्लो १५३ दिनमा सक्रिय संक्रमितको संख्या सबैभन्दा कम बनेको संघीय स्वास्थ्य मन्त्रालयले बताएको छ। हालसम्म तीन करोड १६ लाख ३६ हजार व्यक्ति कोभिड संक्रमणपछि निको भएका छन्। विगत २४ घण्टामा निको भई अस्पतालबाट घर फर्किएका विरामीको संख्या ३८ हजार ४८७ रहेको छ।
स्वास्थ्य मन्त्रालयका अनुसार कोभिड-१९ संक्रमण निको हुने व्यक्तिको संख्या दर बढेर ९७।५७ प्रतिशत पुगेको छ र यो दर सन् २०२० मार्चपछि पहिलोपटक सबैभन्दा बढी हो।
