काठमाडौं– वागमती प्रदेशकी मुख्यमन्त्री अष्टलक्ष्मी शाक्यले एमाले अध्यक्ष केपी शर्मा ओली र नेता माधवकुमार नेपाल दुवैको सहमतिमा आफू मुख्यमन्त्री बनेको बताएकी छन् ।
वागमती प्रदेशसभामा सरकार परिवर्तनको विषयमा आफूले दुवै नेतालाई भेटेर जानकारी गराएको र दुवैको सहमति पाएको उनको भनाइ छ ।
शनिबार काठमाडौंको धुम्बाराहीमा आयोजित एक कार्यक्रममा मुख्यमन्त्री शाक्यले आफूले निवर्तमान मुख्यमन्त्री डोरमणि पौडेलसँगै ओलीलाई भेटेको जानकारी दिइन् । त्यसपछि आफूले नेता नेपाललाई पनि वागमतीमा सरकार फेर्ने सहमतिबारे जानकारी गराएको शाक्यले बताइन् ।
‘हामी मिलेर अघि बढ्न चाहन्छौं, मिलेर अघि बढेका छौं । नीति पास गर्यौं, बजेट पास गर्यौं । अब सरकार पनि हामी चलाउँछौं भनेपछि खुशी हुनुभयो’ उनले भनिन्, ‘राम्रो काम गर्न थाल्नुभयो, अगाडि बढ्नुस् भन्नुभयो । यति पाएपछि के चाहियो ?’
नेकपा विभाजन गरेर माधव नेपालले नयाँ पार्टी गठनका लागि निर्वाचन आयोगमा निवेदन दिएको दिन वागमती प्रदेशमा सरकार फेरबदल भएको थियो । त्यस दिन मुख्यमन्त्री डोरमणि पौडेलले राजीनामा दिई शाक्य मुख्यमन्त्री नियुक्त भएकी थिइन् । ओलीको कट्टर आलोचक शाक्य माधव नेपाल खेमामा थिइन् । उनी एकाएक बागमती प्रदेशको मुख्यमन्त्री बनेपछि कित्ता परिवर्तन गरेको चर्चा छ ।
