काठमाडौं– नेकपा एमालेले माधव नेपालसहित १४ जना सांसदलाई पार्टीबाट निस्कासित गरेको छ ।
निस्कासित हुनेहरुमा एमाले वरिष्ठ नेता नेपालसँगै मुकुन्द न्यौपाने, जीवनराम श्रेष्ठ, रामकुमारी झाँक्री, विरोध खतिवडा, कल्याणी खड्का, लक्ष्मीकुमारी चौधरी, निरादेवी जैरु, पुष्पाकुमारी कर्ण, सरलाकुमारी यादव, कलिला खातुन, कृष्णलाल महर्जन, भवानी खापुङ र मेटमणि चौधरी छन् ।
उनीहरुलाई कारबाही गरेकाले पदमुक्त गर्न भन्दै एमालेले संसद सचिवालयमा पत्र पनि पठाएको छ ।
अध्यक्ष केपी शर्मा ओली र नेपालबीच एकताको प्रयास जारी रहेको बेला गरिएको यो कारबाहीले एकताको प्रक्रियालाई बिगारेको भन्दै एमाले नेताहरुले विरोध गरेका छन् ।
एमाले नेता गोकर्ण विष्टले एकताबद्ध गर्न हदैसम्मको प्रयत्न चलिरहेको बेला गरिएको यो कारबाहीले विभाजनको औचित्य पुष्टि गर्न चाहनेहरुका लागि थप बल पुगेको र एकता पक्षधरलाई निराश बनाएको टिप्पणी गरेका छन् । उनले कारबाही फिर्ता लिएर एकताको लागि थप भूमिका खेल्न अध्यक्ष ओलीलाई आग्रह गरेका छन् ।
दुवै पक्षलाई मिलाउन भूमिका निर्वाह गरिरहेका विष्टले सामाजिक सन्जालमा लेखेका छन्, ‘हरेक संकटमा संयमीत र सुझबुझपूर्ण निर्णयले नै अपेक्षाकृत सफलता प्राप्त गर्न संभव छ । हामी भित्र देखा परेको असामान्य परिस्थितिमा पार्टीलाई जोगाउन जिम्मेवार र असाधारण भूमिका जरुरी पर्दछ । यस्तो अवस्थामा क. नेपाल सहितका सांसदहरूमाथीको कारबाही फिर्ता लिएर एकताको लागि थप भूमिका खेल्न अध्यक्ष कमरेड केपी ओलीसँग हार्दिक आग्रह गर्दछु ।’
