काठमाडौं- कांग्रेसको १४ औँ महाधिवेशनको सरगर्मी बढ्दै जाँदा केन्द्रमा मात्रै होइन, प्रदेश, जिल्ला र स्थानीय तहसम्म पनि आकांक्षीहरू खुलिरहेका छन्।
आफूले चाहेको पदमा उम्मेदवारी घोषणा गर्नेहरूको संख्या बढ्दो छ। कांग्रेस तेह्रथुम जिल्ला सभापति गोविन्द ढुंगाना तिनैमध्येका हुन्। उनी कांग्रेस प्रदेश-१ सभापतिको दाबेदार देखिएका छन्।
तेह्रथुम जिल्ला कार्यसमितिमा आठ वर्ष सचिव र तीन वर्ष सह-सभापतिको जिम्मेवारी वहन गरेका ढुंगानाले जिल्ला सभापतिको जिम्मेवारी पनि १६ वर्षसम्म वहन गरेका छन्।
कांग्रेस प्रदेश-१ सभापतिमा अमृत अर्याल, राजीव कोइराला र उद्धव थापाले पनि दाबी गरिरहेका छन्। मोरङको दुई कार्यकालसम्म सभापति भएका अर्याल अहिले कांग्रेस केन्द्रीय सदस्य छन्। कोइराला सुनसरीका सभापति र प्रदेश-१ मा कांग्रेस संसदीय दलका नेता हुन्। यस्तै, थापा झापाका जिल्ला सभापति हुन्।
अर्याल सभापति शेरबहादुर देउवासँग निकट छन्। अरू सबै इतर समूहका हुन्। झापाका थापा भने कृष्णप्रसाद सिटौलाका प्रिय पात्र हुन् ।
