काठमाडौं- कोभिड-१९ का बिरामी बढ्ने क्रमसँगै विभिन्न जिल्ला र पालिकाहरूले आ–आफ्नो क्षेत्रमा निषेधाज्ञा लगाउन थालेका छन् । तर, कठिन परिस्थितिबीच पनि हवाई उडान नरोक्न एयरलाइन्सहरूले माग गरेका छन् ।
वायुसेवा सञ्चालक संघ नेपालले बुधबार एक विज्ञप्तिमार्फत यात्रा ठप्प भएको समयमा समेत नेपाली नागरिकले विभिन्न माध्यममा जोखिम मोलेर यात्रा गर्नुपर्ने उल्लेख गर्दै तुलनात्मक रूपमा सुरक्षित मानिने हवाई सेवा नरोक्न आग्रह गरेको हो ।
संघका अध्यक्ष रामेश्वर थापाले अहिले दैनिक १२ हजारभन्दा बढी नेपालीले हवाई सेवा प्रयोग गरिरहेको र यस दौरान सरकारले तोकेका मापदण्ड कडाइका साथ पालना भइरहेको विज्ञप्तिमा दाबी गरेका छन् ।
देशको अर्थतन्त्र चलायमान बनाउनसमेत यात्रा पूर्ण रूपमा रोक्न नहुने संघको भनाइ छ । त्यसको साटो खोप अभियानलाई तीव्र बनाउनसमेत व्यवसायीले माग गरेका छन् । अहिले ५० लाखभन्दा बढी नेपालीले कोभिडविरुद्धको खोप लगाइसकेको सन्दर्भलाई भने व्यवसायीले उत्साहजनक बताएका छन् ।
हवाई यात्रा गर्नेमध्ये पनि ५० प्रतिशत यात्रुले खोप लगाएको पाइएको संघको भनाइ छ । हवाई उडानका दौरान जहाजको संक्रमणरहित सरसफाइ, यात्रुको तापमान जाँच, मास्क तथा फेससिल्ड अनिवार्य गरिएको छ । जहाज चढ्नु अगाडि स्यानिटाइजरको प्रयोग गर्नुपर्छ । अहिले नेपाल नागरिक उड्डयन प्राधिकरणले प्रतिघण्टा आठवटा मात्र उडान गर्ने गरी तालिका तोकेको छ ।
