काठमाडौं- क्रियाशील छानविनका सदस्य नै कुटिएपछि कांग्रेसको पदाधिकारी र पूर्वपदाधिकारीको आकस्मिक बैठक जारी छ। प्रधानमन्त्रीको सरकारी निवास बालुवाटारमा १४औं महाधिवेशनका लागि क्रियाशील सदस्यताको विषयमा छलफल आकस्मिक बैठक बोलाइने सह-महामन्त्री प्रकाशशरण महतले जानकारी दिए।
यस्तै, बैठकमा केन्द्रीय महाधिवेशनको कार्यतालिका संशोधन नगरी तल्ला तहका अधिवेशनहरूको कार्यतालिका संशोधन गर्ने सन्दर्भमा पनि छलफल हुने महतको भनाइ छ। यसअघि शुक्रबार पनि बैठक बसेको थियो। आजको बैठकले शुक्रबार सह-महामन्त्री डा. महत र डा. मिनेन्द्र रिजाललाई दिइएको निर्वाचन निर्देशिकाको सन्दर्भमा पनि छलफल गरेर निर्णय लिनेछ।
बैठकमा क्रियाशील सदस्यता छानविन समितिका सदस्य श्यामकुमार घिमिरेमाथि भएको भौतिक आक्रमण्को सन्दर्भमा पनि छलफल हुनेछ। घिमिरेमाथि शुक्रबार क्रियाशील सदस्यताको कार्यप्रति असन्तुष्ट पार्टीकै केही कार्यकर्ताले आक्रमण गरेका थिए।
नेपाली कांग्रेसले भदौको १६ देखि १९ गतेसम्म पार्टीको महाधिवेशन गर्दैछ। यसअघि कांग्रेसले पार्टीको महाधिवेशन कार्यतालिका पटक-पटक संशोधन गर्दै आएको छ। डेढ महिनाभित्र कांग्रेसले महाधिवेशन नगरे पार्टीको अस्तित्व संकटमा पर्नेछ।
