लिभरपुलको उपाधि रक्षा अभियान सकिएको प्रशिक्षक योर्गान क्लपले बताएका छन्। लेस्टर सिटीसँग ३-१ ले पराजित भएपछि क्लपले यस्तो प्रतिक्रिया दिएका हुन्। खेल सकिन १२ मिनट छँदासम्म १-० ले अगाडि रहेको लिभरपुल त्यसपछि आफ्नै गल्तीका कारण तीन गोल बेहोर्न बाध्य भएको थियो।
यस हारसँग लिभरपुल इंग्लिस प्रिमियर लिगमा २४ खेलबाट ४० अंकमा सीमित हुँदै चौथो स्थानमा छ। जब कि, एक खेल कम खेलेको म्यानचेस्टर सिटी ५३ अंकसहित शीर्ष स्थानमा छ। पछिल्ला सात खेलमा लिभरपुलको यो पाँचौँ हार हो। ‘मलाई लाग्दैन हामीले खाडल पुर्न सक्छौँ। हामी अब उपाधिको चिन्ता गरिरहेका छैनौँ,’ क्लपले भने।
गत सिजन २४ खेल खेल्दासम्म लिभरपुलले अहिलेभन्दा २४ अंक बढी जोडेको थियो। तर, यसपटक प्रमुख खेलाडीहरू घाइते भएपछि लिभरपुल एकाएक कमजोर बन्यो। गत अक्टोबरमा सेन्ट्रल डिफेन्डर भिर्गिल भान डिक घाइते भए। त्यसयता, जो गोमेज र जोइल माटिप पनि घाइते छन्। लिभरपुलले गत जनवरीमा दुई डिफेन्डरलाई क्लबमा भित्र्याएको थियो।
साल्केबाट ऋणमा आएका ओजान कावाकले शनिबारकै खेलमार्फत डेब्यु गरे। यद्यपि, नतिजा लिभरपुलको पक्षमा आएन। क्लपको प्रशिक्षणमा गत सिजन तीन दशकपछि पहिलोपटक लिभरपुलले लिग उपाधि जितेको थियो।
