काठमाडौं- १४औँ इन्डियन प्रिमियर लिग (आईपीएल) मा नेपालबाट सन्दीप लामिछाने मात्र अक्सनको अन्तिम सूचीमा परेका छन्। गत साता नेपाल क्रिकेट संघ (क्यान) ले सन्दीपसँगै सात खेलाडीलाई आईपीएलको अक्सनमा समावेश गर्न नाम दर्ता गराएको थियो।
विश्वकै चर्चित तथा महँगो टी-२० फ्रेन्चाइज लिग आईपीएलको अक्सनमा नेपालका अन्य सात खेलाडीले अन्तिम सूचीमा आफूलाई समावेश गर्न सकेनन्। सन्दीप, करण केसी, सोमपाल कामी, कुशल मल्ल, शरद भेषावकर, अविनाश बोहरा, दीपेन्द्रसिंह ऐरी तथा विनोद भण्डारीले गत साता अक्सनमा नाम दर्ता गराएका थिए।
सन्दीपबाहेक अन्य सात नेपाली खेलाडीले पहिलोपटक आफ्नो नाम दर्ता गराएका हुन्। आईपीएलले १४औँ संस्करणका लागि शुक्रबार २ सय ९२ खेलाडीलाई अन्तिम रूप दिँदै अक्सनमा समावेश गरेको भारतीय क्रिकेट बोर्ड (बीसीसीआई) ले जनाएको हो। यसअघि अक्सनमा १ हजार ९७ खेलाडीले आ-आफ्नो नाम दर्ता गराएका थिए। बीसीसीआईले जारी गरेको विज्ञप्तिअनुसार १ सय ६४ जना भारतीय तथा १ सय २५ जना खेलाडी विदेशी छन्।
लिस्टको ६१औँ नम्बरमा सन्दीपको नाम समावेश गरिएको छ। एसोसिएट राष्ट्रबाट तीनजना खेलाडी मात्र अक्सनमा परेका छन्। एसोसिएट राष्ट्रमध्ये अमेरिकाका अली खान र युएईका कात्तिकमा पनि अक्सनमा परेका छन्।
आईपीएलले खेलाडीहरूको मूल्यसमेत निर्धारण गरेको छ। जसअनुसार नेपालका लेग स्पिनर सन्दीपको न्यूनतम मूल्य ४० लाख भारु छ।
