कैलाली– दुई प्रहरी हत्या प्रकरणका मुख्य योजनाकार भनिएका व्यक्तिलाई प्रहरीले पक्राउ गरी सोमबार सार्वजनिक गरेको छ।
धनगढी उपमहानगरपालिका १० का ३४ वर्षीय सुकबहादुर भनिने अमर रानालाई पक्राउपछि सार्वजनिक गरिएको हो।
१ कात्तिकमा नियमित गस्तीमा खटिएका बेला अस्थायी प्रहरी पोस्ट धनगढी जुगेडाका इन्चार्ज प्रहरी सहायक निरीक्षक गोविन्द बिक र जवान रामबहादुर साउदको तस्करहरूले हत्या गरेका थिए ।
असई बिक २ कात्तिकमा नेपाल–भारत सीमा भएर बग्ने मोहना नदीमा मृत फेला परेका थिए । त्यसको दुई दिनपछि साउद पनि मोहना नदीमै मृत फेला परेका थिए । हत्या आरोपमा यसअघि प्रहरीले आठ जनालाई पक्राउपछि सार्बजनिक गरि सकेको छ ।
जिल्ला प्रहरी कार्यालय कैलालीका एसपी अनुपमसमशेर जबराले प्रहरी हत्याका मुख्य योजनाकार राना नै रहेको यसअघि पक्राउ परेकाहरूको बयानबाट खुलेको जानकारी दिए ।
