सुनसरी- बराहक्षेत्र नगरपालिका-२ तेह्र आरडी विश्वकर्मा मन्दिरनजिक बाटो ढुकेर लुटपाट गर्नेलाई प्रहरी पक्राउ गरेको छ।
पक्राउ पर्नेमा बराहक्षेत्र-२ पुनर्वास बस्ने अन्दाजी २१ वर्षका लोकबहादुर तामाङ र वर्ष २० का कर्मा शेर्पा छन्।
उनीहरूले बराहक्षेत्र-७ बांगेका २२ वर्षीय लक्ष्मण भट्टराईलाई लुटेका थिए। लोकल कुखुरा बिक्री गरी साइकलमा घर फर्कने क्रममा उनी दिउँसो १ः३० बजे लुटिएका हुन्।
तामाङ र शेर्पाले बाटो छेकी छुरी देखाएर भट्टराईबाट नगद र मोबाइल लुट्ने प्रयास गरेका थिए। नगद लुट्न नसकेपछि शेर्पा र तामाङ मोबाइल खोसेर फरार भएका थिए।
इलाका प्रहरी कार्यालय चतरालाई लुटपाट भएको जानकारी आएपछि प्रहरीले खोजी कार्य गर्दै जाँदा दुवै आफ्नै घरबाट लुटेको मोबाइलसहित पक्राउ परेका हुन्।
प्रहरी टोलीले उनीहरूलाई इलाका प्रहरी कार्यालय चक्रघट्टीलाई बुझाएको छ। इलाका प्रहरी चक्रघट्टीका निरीक्षक राजेश दत्तका अनुसार पीडित पक्षको किटानी जाहेरी आएपछि सोहीअनुसार मुद्दा चलाउने तयारी छ।
