कैलाली- पाँच वर्षअघि भएको टीकापुर घटनामा कैलाली जिल्ला अदालतले गरेको फैसला उल्ट्याउँदै उच्च अदालत, दीपायलले मुख्य आरोपित रेशम चौधरीसहित आठजनालाई जन्मकैदको फैसला सुनाएको छ।
जिल्ला अदालतबाट सफाइ पाएका र कम सजाय तोकिएकाहरूसमेतलाई गर्दै उच्च अदालतले कैद सजाय थप गरेको हो। त्यसरी कैद सजाय थप गरिएकाहरूमा जिल्ला अदालतको फैसलाअनुसार कैद भुक्तान गरेकाहरू पनि छन्।
दीपायल उच्च अदालतका प्रवक्ता राजेन्द्र लुइँटेलका अनुसार कैलाली क्षेत्र नम्बर १ बाट प्रतिनिधि सभामा निर्वाचित रेशम चौधरीसहित सातजनालाई जन्मकैद तोकिएको छ।
त्यसबाहेक दुई वर्षअघि जिल्ला अदालतले तीन वर्षको कैद सुनाएका थारू अगुवा लक्ष्मण थारूलाई पनि उच्च अदालतले जन्मकैदको सजाय तोकेको छ।
उच्च अदालतका न्यायाधीश टेकनारायण कुँवर र सीताराम मण्डलको संयुक्त इजलासले बिहीबार दिनभरि बहसपछि टीकापुर घटनाको मुद्दामा फैसला सुनाएको हो।
उच्च अदालतले प्रतिनिधि सभा सदस्य रेशम चौधरी, हरिनारायण चौधरी, प्रदीप चौधरी, वीरबहादुर चौधरी, राजेश चौधरी, सीताराम चौधरी, गंंगाराम चौधरी र लक्ष्मण थारूलाई जन्मकैद सुनाएको प्रवक्ता लुइँटेलले जानकारी दिए।
लक्ष्मण थारूलाई यसअघि जिल्ला अदालतले तीन वर्षको सजाय सुनाएको थियो। सोही फैसलाअनुसार तीन वर्ष कैद भुक्तान गरेपछि लक्ष्मण थारू कारागार मुक्त भएका थिए।
जिल्ला अदालतले ११ जनालाई जन्मकैदको सुजाय सुनाएको थियो। उच्च अदालतले तीमध्ये सात जनाको फैसला सदर गरेको हो।
उच्च अदालतको फैसला अनुसार उनीहरूले २० वर्ष कारागारमा बस्नुपर्नेछ। त्यसमा उनीहरु पक्राउ परेको समयदेखि उनीहरूको कैद भएको समय जोडिनेछ।
यस्तै, जिल्ला अदालतले तीन वर्ष कैद सजायको फैसला गरेपछि कैद मुक्त भएका सन्तोष चौधरी, जितबहादुर चौधरी र डिलबहादुर चौधरीलाई उच्च अदालतले १० वर्षको कैद तोकेको छ।
अर्का अभियुक्त श्रवणकुमार चौधरीलाई उच्च अदालतले १० वर्ष कैद सजाय सुनाएको छ। यसअघि उनको हकमा जिल्ला अदालतले पनि १० वर्ष कैद तोकेको थियो।
यसैगरी, सुन्दरलाल कठरिया, बृजमोहन चौधरी, राजेश चौधरी, राजकुमार कठरियालाई उच्च अदालतले पाँच वर्ष कैद सजाय सुनाएको छ। उनीहरूलाई जिल्ला अदालतले तीन वर्ष सजाय तोकेको थियो।
यसअघि जिल्ला अदालतले तीन वर्षको सजाय तोकेका रामप्रसाद चौधरी, सन्तराम चौधरी, किशनलाल चौधरी र प्रेमबहादुर चौधरीलाई उच्च अदालतले पाँच वर्ष कैद सजाय सुनाएको प्रवक्ता लुइँटेलले जानकारी दिए।
यस्तै, चुन्नीराम चौधरी, लाहुराम चौधरी र रामकुमार कठरियाको हकमा जिल्ला अदालतले गरेको फैसलालाई उच्च अदालतले सदर गरेको छ। उनीहरूलाई जिल्ला अदालतले तीन वर्ष कैद तोकेको थियो। उनीहरू कैद भुक्तान गरेर कारागार मुक्त भइसकेका छन्।
प्रवक्ता लुइँटेलका अनुसार टीकापुर घटनाका आरोपित विश्राम चौधरीले उच्च अदालत दीपायलबाट सफाइ पाएका छन्। करन चौधरीको हकमा भने नाबालक भएका कारण कैद मुक्त गर्ने जिल्ला अदालतको फैसलालाई उच्च अदालतले सदर गरेको छ।
थरुहटको माग गर्दै निस्किएको जुलुसले ७ भदौ ०७२ मा टीकापुरमा नेपाल प्रहरीका एसएसपी लक्ष्मण न्यौपानेसहित आठ प्रहरीको हत्या गरेको थियो। सोही क्रममा एक नाबालकको समेत गोली लागेर ज्यान गएको थियो।
उक्त घटनामा ५८ जनाविरुद्ध मुद्दा चलाइएको थियो, तीमध्ये २७ जना पक्राउ परेका थिए। अन्य फरार छन्। जिल्ला अदालतले पक्राउ परेकामध्ये तीन जनालाई सफाइ दिएको थियो। १२ जनालाई तीन वर्ष कैद तोकेको थियो।
