दीपक नेपाल
कैलाली- कांग्रेस युवा नेता तथा पूर्वमन्त्री गगन थापाले संसद्बाट भागेको सरकारलाई ठेगान लगाउन नेपाली कांग्रेस देशैभरि सडकमा उत्रिएको बताएका छन्।
कांग्रेसद्वारा धनगढीमा आयोजित विरोध सभालाई सम्बोधन गर्दै थापाले बरालिएको सरकारलाई ठेगान लगाउन कांग्रेस सडकमा आएको बताए। सरकारलाई ठेगान नलगाएसम्म कांग्रेस घर फिर्ता नहुने उनको जिकिर थियो।
‘सरकार शक्तिशाली छ। तर, जनतालाई शक्तिशाली बनाउन सरकारले कुनै काम गरेको छैन, हावादारी गफमा समय बिताइरहेको छ,’ उनले आरोप लगाए।
थापाले केन्द्र सरकार मात्रै दोषी नरहेको बताउदै लाचार र निरिह मुख्यमन्त्रीका कारण सुदूरपश्चिमका जनताले दुःख पाएको आरोप पनि लगाए। उनले भने, ‘मुख्यमन्त्रीजी, क्षमा गर्नुहोला। तपाईंजस्तो निरिह र लाचार मुख्यमन्त्रीका कारण सुदूरपश्चिमका जनताले दुःख पाए। सुदूरपश्चिममा लेखराज भट्ट र भीम रावलको पहलमा सेनिटाइजर बाँडियो भनेर समाचार आउँछ। प्रदेश सरकारले के गर्यो ?’
सभालाई पूर्वस्वास्थ्य मन्त्री रामजनम चौधरीलगायतले सम्बोधन गरेका थिए। धनगढी चौराहाबाट शुरु भएको र्याली पार्क चोकमा पुगेर सभामा परिणत भएको थियो।
