जाजरकोट (रासस)- व्यावसायिक कस्तुरी पालनका लागि जिल्लाको बारेकोट गाउँपालिका सक्ला रानीचौरमा प्रजनन केन्द्र निर्माणाधीन छ।
उक्त परियोजनामा गत वर्षदेखि काम शुरु भएको हो। कस्तुरी मृग पाल्न चाहनेलाई बीउ प्राणी उपलब्ध गराउन सरकारले प्रजनन केन्द्र स्थापना गरिरहेको वन तथा वातावरणमन्त्री शक्तिबहादुर बस्नेतले जानकारी दिए।
प्रजनन केन्द्रका लागि भवन निर्माण जारी छ। तीन करोड ५० लाख रुपैयाँ लागतमा राष्ट्रिय प्रकृति संरक्षण कोषले काम अगाडि बढाएको हो। बारेकोटका अग्ला हिमालमा पाइने कस्तुरीलाई रानीचौरको प्रजनन केन्द्रमा ल्याएर बच्चा उत्पादन गरिनेछ।
नेपालमा कालो, कश्मीर, अल्पाइन, हिमाली गरी चार प्रजातिका कस्तुरी पाइन्छन्। तीमध्ये हिमाली र कश्मीर प्रजातिलाई प्रजनन केन्द्रमा राखेर बीउ प्राणी जन्माउने योजना छ।
वन्यजन्तु पालनका लागि सरकारले २३ मंसिर ०७६ मा लाइसेन्स र बीउ प्राणीका लागि राजपत्रमा सूचना प्रकाशित गरेको थियो। कस्तुरी पालनको लाइसेन्स लिन एक लाख र एउटा बीउ प्राणीका लागि ७५ हजार रुपैयाँ दस्तुर तोकिएको छ।
प्रजनन केन्द्रमा भाले र पोथी गरी कम्तीमा २० वटा कस्तुरी मृग प्राकृतिक बासस्थानबाट संकलन गरी राखिने छ।
