काठमाडौं- कोभिड-१९ का कारण ठप्प चलचित्र क्षेत्र अभिनेत्री श्वेता खड्काको बिहे प्रसंगले अहिले तातिएको छ। खड्काको बिहेसँगै विवाह गर्न बाँकी अन्य अभिनेत्रीको बिहेको चर्चा पनि हुन थालेको छ।
रिमा विश्वकर्मा पछिल्लो समय चलचित्र र रियालिटी सोको होस्टका रूपमा व्यस्त अभिनेत्री हुन्। उनी पनि हालसम्म सिंगल छिन्। निकटस्थहरूका अनुसार उनलाई बिहेका लागि परिवारबाट दबाब छ।
रिमाले भने तत्काल खोजेजस्तो र मनको कुरा बुझ्ने जीवनसाथी नभेटिएको बताउने गरेकी छन्। उनले हालै एक अन्तरवार्तामा उनले विवाह तत्कालका लागि आफ्नो प्राथमिकतामा नभएको पनि बताएकी छन्।
‘अहिले मेरो मुख्य प्राथमिकता भनेको करिअर, परिवार र मेरो स्वास्थ्य हो,’ विश्वकर्माले भनेकी छन्, ‘अभिभावकले छोराछोरीको साथी भयो भने राम्रो हुन्छ भन्ने सोच्नु स्वfभाविक हो, तर मेरो परिवार बुझ्ने हुनुहुन्छ।’
विवाहको कुराकानी चलिरहे पनि आफैँ तयार नभएको उनको भनाइ छ। उनी भन्छिन्, ‘बिहे भनेको योजना गरेर हुने पनि होइन, त्यसैले बिहे मेरो प्राथमिकतामा छैन।’
हालै कमेडी च्यापियनको होस्ट गरेकी उनी लिटल च्याम्प डान्स मास्टरको होस्ट गर्ने तयारीमा छिन्। यसअघि उनले नेपाल आइडल सञ्चालन गरेर पनि चर्चा कमाएकी थिइन्।
