काठमाडौं- प्रमुख प्रतिपक्षी दल कांग्रेसले चाँडो संसद् बैठक बोलाउन माग गरेको छ। राष्ट्रिय मुद्दासँगै देश र जनताका ज्वलन्त सवालमाथि छलफल गर्न संसद् बैठक आवश्यक भएको कांग्रेसको भनाइ छ। एउटा अधिवेशन अन्त्य भएपछि ६ महिनाभित्र अर्को अधिवेशन अनिवार्य बोलाउनुपर्ने संवैधानिक व्यवस्था रहेको स्मरण पनि कांग्रेसले गराएको छ। र,१८ पुससम्ममा अनिवार्य रूपमा संसद् बैठक बोलाउनुपर्ने कांग्रेसले औंल्याएको छ।
पार्टी सभापति शेरबहादुर देउवानिवास बूढानीलकण्ठमा शुक्रबार सम्पन्न पदाधिकारी र पूर्वपदाधिकारी सम्मिलित बैठकले सरकार र प्रतिनिधिसभामा सभामुखसमक्ष संसद् बैठक बोलाउन माग गर्ने निर्णय गरेको हो।
कांग्रेस सांसद र केन्द्रीय सदस्यहरूले पनि पटक-पटक संसद्को विशेष अधिवेशन माग गर्न सभापति देउवालाई दबाब दिँदै आएका छन्। तर, सभापति देउवाले त्यसबारे चासो दिएका थिएनन्। २८ कात्तिकमा सम्पन्न केन्द्रीय समिति बैठकमा पनि त्यसबारे माग उठेको थियो।
कोरोना भाइरसको बढ्दो संक्रमण नियन्त्रण, रोकथाम र उपचारजस्ता सार्वजनिक चासोका विषयमा छलफल गर्न पनि संसद् बैठक आवश्यक भएको कांग्रेसको भनाइ छ।
संविधानको धारा ९३ उपधारा (३) मा प्रतिनिधिसभाको अधिवेशन चालु नरहेको अवस्थामा बैठक बोलाउन वाञ्छनीय छ भनी एकचौथाइ सदस्यले लिखित अनुरोध गरेमा प्रतिनिधिसभाको बैठक बस्ने व्यवस्था छ। यसअघि कांग्रेस सांसद गगन थापा, केन्द्रीय सदस्य धनराज गुरुङसहितका नेताले त्यही व्यवस्थाका आधारमा विशेष अधिवेशन माग गरेर भए पनि सरकारलाई संसद्मा ल्याउनुपर्ने सभापति देउवालाई बताउँदै आएका थिए।
नेकपाभित्र विवाद उत्कर्षमा पुगेका वेला प्रधानमन्त्री केपी ओलीले १८ असारमा मन्त्रिपरिषद् बैठकबाट निर्णय गराएर संसद् अधिवेशन अन्त्य गर्न राष्ट्रपतिसमक्ष सिफारिस गरेका थिए। उक्त कदमको कांग्रेसले विरोध गरेको थियो।
