काठमाडौं- अपांगता भएका महिला विषयमा आधारित वृत्तचित्र सार्वजनिक भएको छ। २९ औं अपांगता दिवसको पूर्वसन्ध्यामा नेपाल नेत्रहीन महिला संघले बुधबार वृत्तचित्र सार्वजनिक गरेको हो।
रिपोर्टर्स क्लबमा आयोजित कार्यक्रममा बोल्दै नेत्रहीन महिला संघकी अध्यक्ष सीता सुवेदीले दृष्टिहीन महिला तथा अन्य अपांग भएका महिलालाई अधिकार दिलाउन विशेष कार्यक्रममा जोड दिइन्। अपांगता भएका महिलाको शिक्षा, स्वास्थ्य, रोजगारी र सुरक्षाजस्ता मानव अधिकारका न्यूनतम आधारभूत पक्षमा राज्य र समाजले ध्यान दिनुपर्ने उनले बताइन्।
उनका अनुसार नेत्रहीन महिला संघले १५ जिल्लाका विभिन्न शाखामा दृष्टिहीन महिलालाई संगठित गरिएको छ। प्रदेश-२ मा मुस्लिम समुदायका नेत्रहीन महिला स्वास्थ्य र शिक्षाबाट वञ्चित रहेको उनले बताइन्।
राष्ट्रिय अपांग महासंघकी उपाध्यक्ष रमा ढकालले अपांगता भएका महिलाको समस्या र चुनौतीबारे वृत्तचित्रले उजागर गरेको बताइन्।
नेपाल अपांग महिला संघको तर्फबाट मीना पौडेलले प्रदेश-२ का रौतहट, बारा र रौतहटका महिला अझ पिछडिएको अवस्थामा रहेको बताइन्। नेत्रहीन महिला संघकी कार्यक्रम अधिकृत लक्ष्मी नेपालले अपांगता भएका महिलाको समस्याबारे उल्लेख गरिन्।
