बीबीसी नेपाली सेवाबाट
काठमाडौं- बेलायत फाइजर र बायोएनटेक खोपलाई बृहत् रूपमा प्रयोग गर्न अनुमति दिने विश्वकै पहिलो देश बनेको छ।
ब्रिटिश नियामक संस्था एमएचआरएका अनुसार ९५ प्रतिशतसम्म सुरक्षा प्रदान गर्ने सो खोप आगामी सातादेखि लगाउन शुरु गर्न सकिनेछ। खोप लगाउन केही दिनमै सर्वाधिक जोखिममा रहेका मानिसबाट शुरु हुने अपेक्षा गरिएको छ।
बेलायतले सो खोपको चार करोड डोज खरिद गरिसकेको छ, जुन दुई करोड मानिसलाई पर्याप्त हुनेछ। त्यसमध्ये एक करोड डोज तुरुन्तै उपलब्ध हुने र आठ लाख डोज केही दिनमा आइपुग्ने बताइएको छ।
इतिहासमै यो सबैभन्दा छिटो स्वीकृति पाउने खोप बनेको छ। १० महिनामा यो खोप योजनाबाट अनुमतिसम्म आइपुगेको हो। कतिपय खोपका लागि यो अवधि एक दशकभन्दा लामो थियो। बेलायतका स्वास्थ्यमन्त्री म्याट ह्यान्ककले ’सहयोग आउँदै छ’ भनेर ट्विट गरेका छन्।
एनएचएसका प्रमुख कार्यकारी सर साइमन स्टेभेन्सले बेलायतको स्वास्थ्य सेवाले देशको इतिहासमै सबैभन्दा बृहत् खोप कार्यक्रमको तयारी गरिरहेको बताएका छन्। खोप कार्यक्रमका लागि लगभग ५० अस्पताल तयारी अवस्थामा राखिएको छ र अन्य खोप केन्द्रहरू तयार गर्न थालिएको छ।
विज्ञहरूले खोप शुरु भएपछि पनि मानिस सतर्क हुनुपर्ने र स्वास्थ्य सावधानी अपनाउनुपर्ने बताएका छन्। यसले सम्पूर्ण रूपमा प्रयोगात्मक प्रक्रिया अपनाएको छ, जुन प्रकृयामा मानव शरीरको रोग प्रतिरोधी क्षमतालाई कोरोनाभाइरसविरूद्ध लड्न अभ्यस्त तुल्याउन उक्त भाइरसको जेनेटिक कोडको एक भागलाई सुईमार्फत शरीरमा प्रवेश गराउने विधि संलग्न छ।
विगतका परीक्षणहरूमा उक्त खोपले शरीरलाई कोरोना भाइरससँग लड्न एन्टिबडि निर्माण र टी-सेल भनिने शरीरको रोग प्रतिरोधी क्षमताको अर्को भाग तयार पार्न अभ्यस्त तुल्याउने देखिएको थियो। तीन साताको अन्तरालमा उक्त खोपको दुई डोज आवश्यक पर्छ।
अमेरिका, जर्मनी, ब्राजिल, अर्जेन्टिना, दक्षिण अफ्रिका र टर्कीमा गरिएका परीक्षणहरूमा उक्त खोपको दोस्रो मात्रा दिइएको सात दिनपछि खोप दिइएकाहरू मध्ये ९० प्रतिशतलाई कोरोना भाइरस संत्रमणबाट सुरक्षा प्राप्त भएको थियो।
औषधि निर्माण कम्पनी फाइजरको विश्वासमा उसले यस वर्षको अन्त्यसम्ममा पाँच करोड डोज खोप आपूर्ति गर्न सक्नेछ। र, सन् २०२१ को अन्त्यसम्ममा एक अर्ब ३० करोड डोज आपूर्ति गर्न सकिने कम्पनीले बताएको छ।
