वीरगञ्ज- औद्योगिक तथा व्यापारिक घराना प्रेस्टिज समूहले ४० करोड रुपैयाँ लगानीमा अत्याधु्निक कार्पेट उद्योग सञ्चालनमा ल्याएको छ। वीरगञ्ज-पथलैया औद्योगिक कोरिडोरमा स्थापित प्रेस्टिज कार्पेट इन्डस्ट्रीले उत्पादन थालेको हो।
उद्योगले दुई महिनादेखि व्यावसायिक उत्पादन गरिरहेको छ। उद्योगले गत वैशाखमै बजारमा उत्पादन पुर्याउने लक्ष्य राखेको थियो।
कोरोना महामारी र लकडाउनका कारण योजना पछाडि धकेलिएको उद्योग व्यवस्थापनले बताएको छ। ‘वैशाखदेखि नै बजारमा आउने लक्ष्य थियो। तर, कोरोना महामारीका कारण पाँच महिना ढिला भयौं,’ उद्योगका सञ्चालक वीरेन्द्र शाहले भने ‘उत्पादन थालेको दुई महिना भयो। छोटै समयमा बजारबाट उत्साहजनक प्रतिक्रिया पाइरहेका छौं।’
आधुनिक प्रविधिका आधारमा यो उद्योग नेपालमै पहिलो भएको सञ्चालक शाहले बताए। भारतमा समेत हालसम्म यो प्रविधि नभित्रिएको उनको दाबी छ।
अमेरिका र अस्ट्रेलियाबाट भित्र्याइएको प्रविधिमा आधारित उद्योगले अहिले २० वटा डिजाइनमा टफ्टेड कार्पेट उत्पादन गरिरहेको छ।
बजारको माग र आवश्यकताका आधारमा डिजाइन थप्दै लैजाने योजना उद्योगको छ। नयाँ प्रविधिबाट गुणस्तर र लागतलाई प्रतिस्पर्धी बनाउने रणनीति उद्योगले लिएको छ। आधुनिक र स्वचालित प्रविधिबाट उत्पादित यो कार्पेटमा ढुसी नलाग्ने दाबी उद्योगको छ। दैनिक आठ घण्टा चल्दा यो उद्योगले वर्षमा नौ लाख वर्गमिटर कार्पेट उत्पादन गर्न सक्ने जानकारी व्यवस्थापनले दिएको छ।
नेपालमा राम्रो बजार सम्भाव्यता देखेर कार्पेट उत्पादनमा हात हालेको शाहले बताए। नेपालमा अहिले वार्षिक १० अर्ब रुपैयाँबराबरको कार्पेट खपत हुने अनुमान छ।
अहिले स्वदेशी बजारमा अधिकांश खपत आयातित कार्पेटको छ। साउदी अरेबिया, टर्की र युरोपबाट कार्पेट आयात हुन्छ। प्रेस्टिज समूहले अहिले कार्पेट आयात भइरहेको युरोपेली देशमा आफ्नो उत्पादन निकासीको उद्देश्य राखेको छ।
‘उत्पादनको ४० देखि ५० प्रतिशत स्वदेशी बजारमा खपत हुन्छ। बाँकी परिमाण निकासीको योजना छ। सरकारले निकासीमा अनुदान दिने हो भने अन्तर्राष्ट्रिय बजारमा प्रतिस्पर्धा सहज हुने थियो,’ शाहले भने।
कच्चा पदार्थ आयात र निकासीमा सहुलियत पाएमा बाह्य बजारमा स्थापित हुन झन् सजिलो हुने अपेक्षा उद्योगको छ। शुरूमा निकट छिमेकी भारत, पाकिस्तान हुँदै युरोप र अमेरिकी बजारमा पुग्ने योजना उद्योगले राखेको छ।
निकट भविष्यमा एक अर्ब रुपैयाँको लागतमा पीभीसी कार्पेट उद्योग सञ्चालनमा ल्याउने तयारी यो औद्योगिक समूहको छ। प्रेस्टिज समूहले यसअघि नै कपडा, फुटवेयर, म्याटलगायत उत्पादन गर्दै आएको छ।
