सिंगापुर (रोयटर्स)- चिनियाँ कम्पनी सिनोभ्याक बायोटेकले उत्पादन गरिरहेको कोरोना भाइरसविरुद्धको खोप तेस्रो चरण परीक्षणमा छ। अमेरिका र युरोपेली मुलुकमा भइरहेको परीक्षणमा प्रभावकारी नतिजा आएको अनुसन्धानकर्मीहरूको दाबी छ।
खोपको नाम कोरोनाभ्याक दिइएको छ। उक्त खोप कोराना नियन्त्रणमा ९० प्रतिशत सफल देखिएको कम्पनीले बताएको छ।
अन्य चिनियाँ कम्पनी पनि कोरोनाविरुद्ध खोप तयार पार्न जुटेका छन्। तीमध्ये कोरोनाभ्याक प्रभावकारी देखिएको सिनोभ्याकको भनाइ छ।
मेडिकल जर्नल ‘द लान्सेट’का अनुसार यो खोपको पहिलो र दोस्रो चरणको परीक्षण सन्तोषजनक थिएन। तेस्रो चरणमा भने ९० प्रतिशत प्रभावकारी देखिएको द लान्सेटले उल्लेख गरेको छ।
सन् २०२१ अप्रिल वा मेसम्म खोपले शतप्रतिशत सफलता पाउने कम्पनीको दाबी छ। ‘त्यतिन्जेलमा ९९ प्रतिशत सफलता पाउने विश्वासमा छौं,’ दी लान्सेटमा अनुसन्धानकर्मी चु फेङकाईले भनेका छन्।
उनका अनुसार सिनोभ्याक पहिलो चरणमा एक सय ४४ जनामाथि परीक्षण गरिएको थियो। दोस्रो चरणमा ६ सयजनाले यो खोप प्रयोग गरेका थिए। तेस्रो चरणसम्म पुग्दा आपतकालीन अवस्थामा सिनोभ्याक विभिन्न देशमा परीक्षण गरिएको अनुसन्धानकर्ता फेङकाईले बताए।
‘तेस्रो चरणको परीक्षणलाई हामीले आपतकालीन अवस्था मानेका छौं,’ उनले भने, ‘यो चरणमा सोचेभन्दा बढी सफलता प्राप्त भयो।’ विश्वभरबाट सिनोभ्याकको तेस्रो चरण परीक्षणको सबै विवरण आइनसकेको उनले जानकारी दिए।
