काठमाडौँ । रवि लामिछाने नेतृत्वको राष्ट्रिय स्वतन्त्र पार्टीले प्रतिनिधिसभा सदस्य निर्वाचनमा तीन निर्वाचन क्षेत्रमा जित हासिल गरेको छ ।
मुलकभर मत गणना जारी रहँदा स्वतन्त्र पार्टीले काठमाडौँका १० मध्ये तीन निर्वाचन क्षेत्रमा जित हासिल गरेको हो ।
काठमाडौँ २ मा उपाध्यक्ष सोविता गौतम, ७ मा गणेश पराजुली र ८ मा विराजभक्त श्रेष्ठ प्रतिनिधिसभा सदस्यमा निर्वाचित भएका छन् ।
गौतम १५ हजार २२९ मतसहित विजयी भएकी हुन् । उनले एमालेका मणिराम फुँयाललाई हराइन । फुँयालले ११ हजार ५५५ मत पाए ।
राप्रपाका कुन्तीदेवी पोखरेलले ११ हजार १४ मत ल्याउँदा पूर्वसभामुखसमेत रहेकी माओवादी केन्द्रकी ओनसरी घर्तीमगर नौ हजार ४४९ मतसहित चौथो स्थानमा रहिन् ।
काठमाडौँ ७ मा पनि एमाले नै निकटतम प्रतिस्पर्धी बनेको छ । पराजुली आठ हजार ७४३ मतसहित विजयी हुँदा उनका निकटतम प्रतिस्पर्धी एमालेका शिवकुमार घिमिरेले ६ हजार ८०० मत मात्र पाए । माओवादी केन्द्रकी मानुषी यमी भट्टराईले ६ हजार ६३ मत पाइन् ।
काठमाडौं ८ बाट विराजभक्त श्रेष्ठ १० हजार १०५ मतसहित निर्वाचित भएका छन् । निकटतम प्रतिस्पर्धी हाम्रो नेपाली पार्टीका सुमन सायमीले ६ हजार १७४ मत पाए । सत्ता गठबन्धनका उम्मेदवारसमेत रहेका एकीकृत समाजवादीका नेता तथा पर्यटनमन्त्री मन्त्री जीवनराम श्रेष्ठले चार हजार ८७७ मत पाए ।
ललितपुर ३ मा तोसिमा कार्की विजयी भएकी छन् । बुधबार बिहान सार्वजनिक मत परिणामअनुसार उनले १४ हजार २०८ मत पाइन् । उनका निकटतम् प्रतिस्पर्धी नेकपा एमालेका उम्मेदवार अमृत खड्काले आठ हजार २२३ मत पाए ।
स्वतन्त्र पार्टी मत गणना जारी भएका पाँच निर्वाचन क्षेत्रमा लिड गरिरहेको हो । सुनसरी २ मा लालविक्रम थापा, काठमाडौं ६ मा शिशिर खनाल, चिवतन १ मा हरि ढकाल र २ मा रवि लामिछानेले लिड गरिरहेका हुन् ।
