काठमाडौँ । नेकपा एकीकृत समाजवादीका अध्यक्ष माधव नेपाल रौतहट १ बाट उम्मेदवारी दर्ता गराएका छन् । आगामी मंसिर ४ गते हुने निर्वाचनमा प्रतिनिधिसभाका लागि गठबन्धनका साझा उम्मेदवारका रूपमा प्रत्यक्षतर्फ उनले मनोनयन दर्ता गराएका हुन् ।
यस्तै, सम्मानिता नेता झलनाथ खनाल इलाम १ बाट उम्मेदवारी दिएका छन् । पार्टीका उपाध्यक्ष तथा बागमती प्रदेशका मुख्यमन्त्री राजेन्द्रप्रसाद पाण्डे धादिङ १, पार्टी उपमहासचिव एवं प्रचार विभाग प्रमुख जगनाथ खतिवडा उदयपुर २ बाट उम्मेदवारी दिएका छन् ।
संस्कृति नागरिक उड्डयन तथा पर्यटनमन्त्री जीवनराम श्रेष्ठ काठमाडौँ ८, सहरी विकासमन्त्री मेटमणि चौधरी दाङ १, श्रम, रोजगार तथा सामाजिकमन्त्री शेरबहादुर कुँवरले अछाम १ बाट उम्मेदवारी दिएको पार्टीले जनाइएको छ ।
पार्टीका नेता किसान श्रेष्ठ बारा क्षेत्र ४, कृष्णलाल महर्जन ललितपुर २, विरोध खतिवडा मकवानपुर २, श्रीनाथ बराल कास्की २, रामकुमारी झाँक्री गुल्मी २, सोमप्रसाद पाण्डे पाल्पा २, राजु गुरुङ रुपन्देही २, प्रकाश ज्वाला सल्यान, धनबहादुर बुढा डोल्पा, अम्बर थापा दैलेख १, भानुभक्त जोशी बझाङ, प्रेमबहादुर आले डोटीबाट उम्मेदवारी दिएका छन् ।
गठबन्धनका तर्फबाट नेकपा एसले एक सय ६५ निर्वाचन क्षेत्रमध्ये १९ सिट प्राप्त गरेको हो ।
