पेरिस- एक सातादेखि फ्रान्सका जंगलमा लागेको डढेलो नियन्त्रणबाहिर छ। डढेलो नियन्त्रणका लागि अन्य युरोपेली मुलुक पनि अगाडि सरेका छन्।
फ्रान्सको जिरोन्डे क्षेत्रमा लागेको डढेलोले पाँच दिनदेखि झन् विशाल रूप लिँदै गएपछि फ्रान्स एक्लैले नियन्त्रणमा लिन नसक्ने देखिएको हो। फ्रान्सेली अधिकारीहरूले बिहीबार साँझ देशको दक्षिणपश्चिम क्षेत्र ज्यादै सुक्खा बनेकोले ज्वालामुखीझैं आगो फैलिएको र त्यो बढ्दै गएर फ्रान्सका अन्य धेरै भागमा फैलिन सक्ने चेतावनी दिएका थिए।
त्यसलगत्तै राष्ट्रपति इमानुएल म्याक्रोनले थप पाँच युरोपेली सहयोगीहरूले देशभरका आठ ठूला डढेलोसँग शुक्रबार बिहानैदेखि लडिरहेको आफ्नो ट्विटरमा उल्लेख गरेका छन्। उनका अनुसार जर्मनी, ग्रिस र पोल्यान्डले फ्रान्सको डढेलो नियन्त्रणमा सहयोग थालेका छन् तथा रोमानिया र अस्ट्रियाका अग्निनियन्त्रहरू समेत थपिँदै छन्।
फ्रान्सको दक्षिणमा रहेको जिरोन्डे क्षेत्रमा लागेको डढेलोले १७ घर जलाएको छ भने करिब ११ हजार नागरिकलाई सुरक्षित स्थानमा सारिएको छ। फ्रान्सका करिब ११ सय अग्नि नियन्त्रक र पाँचवटा अग्नि नियन्त्रक हवाई जहाजलेसमेत डढेलो नियन्त्रणमा लिनुको साटो झनै फैलिएपछि अन्य युरोपेली देशको सहयोग लिइएको हो।
यस क्षेत्रको तापक्रम बिहीबार ४० सेल्सियस पुगेको र हावा फरक–फरक दिशाबाट तीव्र रूपमा बहेपछि आगो निभाउन समस्या भएको अग्नि नियन्त्रकहरूको भनाइ छ।
जिरोन्डे क्षेत्रमा मात्रै ६,८०० हेक्टर वन जलेको छ। डढेलोबाट निस्किएको धुवाँले स्पेनतर्फ जाने बोर्दो र बायोन सहरको मुख्य राजमार्ग ए ६३ बन्द गर्न बाध्य बनाएको छ। हाल फ्रान्सका धेरै भागहरूमा आठ वटा ठूला डढेलो फैलिएका छन्। गृहमन्त्री गेराल्ड डार्मानिनले स्विडेन र इटालीले मद्दतको लागि आगो निभाउने विमानहरू पठाउन लागेको बताएका छन्।
