वासिङ्टन- अमेरिकी राष्ट्रपति जो बाइडेन र चिनियाँ समकक्षी सी जिनपिङबीच टेलिफोन वार्ता भएको छ। दुई घण्टा लामो वार्तामा दुवै नेताले ताइवान मामिलालाई लिएर एकअर्कालाई चेतावनी दिएका छन्।
ताइवानको अवस्था फेरिने विषयमा कुनै पनि एकतर्फी कदम सह्य नहुने बाइडेनले सीलाई चेतावनी दिए। र, ताइवान मामिलामा अमेरिकाको नीतिमा कुनै परिवर्तन नआएको प्रष्ट्याए।
राष्ट्रपति सीले अमेरिकी समकक्षीलाई एक चीन नीति पालना गर्न आग्रह गरे। र, उनले कसैले पनि आगोसँग खेल्ने प्रयास ग¥यो भने जल्ने चेतावनी दिए। एक चीन नीतिलाई समर्थन दिएका मुलुकहरूले ताइवानलाई कूटनीतिक मान्यता दिएका छैनन्। तर, अमेरिकाले ताइवानलाई स्वतन्त्र मुलुक मान्दै आएको छ। र, उसलाई हतियार बिक्री गर्ने गरेको छ।
चीन ताइवानलाई आफ्नो एक प्रान्त मान्छ। र, अन्ततः कुनै दिन चीनसँग विलय हुने ठान्दै आएको छ। ताइवान भने आफूलाई स्वतन्त्र राष्ट्र मान्छ।
अमेरिकी संसद कंग्रेसकी सभामुख नेन्सी पेलोसीको ताइवान यात्रालाई लिएर यतिबेला चीन क्रुद्ध छ। उनको यात्राअघि नै अमेरिका र चीनबीच तनाव बढेको छ।
सभामुख पेलोसी अमेरिकाकी तेस्रो शक्तिशाली अधिकारी हुन्। उनको यात्राबारे अमेरिकी विदेश मन्त्रालयले कुनै जानकारी सार्वजनिक गरेको छैन। उनले ताइवान यात्रा गरेमा अमेरिकाले गम्भीर परिणाम भोग्नुपर्ने चेतावनी चीनले दिएको छ।
