काठमाडौं- काठमाडौं महानगरपालिकाले आजदेखि फोहोर उठाउन सुरू गर्ने भएको छ।
एक हप्तादेखि नउठाएको फोहोर महानगरपालिकाले आजदेखि उठाउन लागेको हो।
महानगरपालिकाले सूचना जारी गरेर बिहानैदेखि फोहोर संकलन सुरू गर्ने जानकारी दिएको छ।
डम्पिङस्थल बञ्चरेडाँडासम्म जाने सडकमा निर्माण कार्य भइरहेकाले महानगरपालिकाले एक हप्तासम्म फोहोर संकलन र ढुवानी रोकेको थियो।
यस अवधिभर कुहिने र नकुहिने फोहोर छुट्याएर घरमै राख्न महानगरपालिकाले अनुरोध गरेको थियो।
महानगरपालिकाले जारी गरेको सूचनामा बञ्चरेडाँडासम्म पुग्ने सडक निर्माण कार्य सकिएको र आजदेखि फोहोर उठाइने बताइएको छ।
एक हप्तासम्म फोहोर संकलन नहुँदा काठमाडौंका चोक र सडकहरूमा फोहोर थुप्रिएको छ।
