जनकपुर- इन्धन बचत गर्न जनकपुर उपमहानगरपालिकाले साइकल यात्रा प्रबर्द्धन गर्ने अभियान थालेको छ।
त्यसका लागि सातामा एक दिन शुक्रबार साइकल या पैदल यात्राबाट कार्यालय जाने अभियान उपमहानगरले शुरु गरेको छ। नगरप्रमुख मनोजकुमार साह, उपप्रमुख किशोरी साहलगायत जनप्रतिनिधि र कर्मचारीले शुक्रबार साइकलमा नगर परिक्रमा गर्दै अभियान शुरु गरेका हुन्।
अबदेखि जनप्रतिनिधि र कर्मचारीहरू शुक्रबार पैदल वा साइकलमा कार्यालय आउने नगरप्रमुख साहले बताए। उनका अनुसार आगामी शुक्रबारदेखि उनीहरूको मोटरसाइकल उपमहानगर परिसरमा प्रवेश निषेध गरिने छ। शुक्रबार र शनिबार दुई दिन सरकारी सवारी नचलाउँदा इन्धन खर्च कटौती हुने र लाखौं रुपैयाँ बचत हुने उनको भनाइ छ।
चालु आर्थिक वर्ष ०७९–८० को उपमहानगरको नीति तथा कार्यक्रममा साताको एक दिन साइकल चढ्ने र पालिकाभित्रका अन्य कार्यालयलाई समेत साइकल प्रयोग गर्न पत्राचार गर्ने उल्लेख छ। उपमहानगरले शुक्रबार साइकल प्रयोग गर्न पालिकाभित्रका सम्पूर्ण सरकारी र गैरसरकारी संघसंस्थालाई पत्राचार गरिसकेको छ।
नगरवासीले साइकलको प्रयोग बढाउन् भन्ने उद्देश्यले यो अभियान शुरु गरिएको नगरप्रमुख साहको भनाइ छ। र, त्यसका लागि पहिलो चरणमा नगरपालिकाबाटै अभियान शुरु गरिएको उनले बताए। पैदल र साइकल यात्रालाई प्रोत्साहन गर्न नगरप्रमुख साहसहितको टोलीले बिहीबार पैदल नगर परिक्रमा गरेको थियो।
