काठमाडौं- किसानसँग घुस बार्गेनिङ गर्ने गाउँपालिकाका प्रशासकीय अधिकृत अख्तियारको फन्दामा परेका छन्।
कैलालीको मोहन्याल गाउँपालिकाका अधिकृत दीपेन्द्रबहादुर बुढाक्षत्री सेवाग्राहीबाट घुस लिएको आरोपमा पक्राउ परेका हुन्। अख्तियार, महेन्द्रनगरको टोलीले उनलाई ३० हजार रुपैयाँ घुससहित आइतबार पक्राउ गरेको छ।
बीउबिजन सामग्रीको रकम भुक्तानीवापत मागिएको घुससहित कैलालीको सुखडस्थित नवरत्न होटलबाट बुढाक्षत्रीलाई नियन्त्रणमा लिइएको अख्तियारले जनाएको छ। आयोगको सम्पर्क कार्यालय महेन्द्रनगरका प्रमुख रामबहादुर कुरुम्बाङका अनुसार उनले भुक्तानी दिनका लागि पटक–पटक घुस मागेका रहेछन्। ‘सम्बन्धित व्यक्तिबाट गुनासो आएपछि हामीले निरन्तर ‘फलोअप’ गरिरहेका थियौँ,’ कुरुवाङले भने। बीउबिजन आपूर्तिकर्ताले भुक्तानीका लागि क्षत्रीलाई यसअघि पनि १४ हजार रुपैयाँ दिएको खुलेको छ।
