काठमाडौं- न्याय परिषद्ले उच्च र जिल्ला अदालतका १–१ न्यायाधीशलाई पदबाट बर्खास्त गरेको छ।
उच्च अदालत सुर्खेतको जुम्ला इजलासका नसरुल्लाह अन्सारी र बर्दिया जिल्ला अदालतका न्यायाधीश लोकजंग शाहलाई बर्खास्त गर्न परिषदले कामु प्रधानन्यायाधीश दीपककुमार कार्कीलाई सिफारिस गरेको हो।
खराब आचरण र कार्यक्षमता अभाव रहेको पुष्टि भएपछि उनीहरूलाई पदमुक्त गर्न परिषदले सिफारिस गरेको छ। उनीहरूविरुद्ध परेका उजुरीमाथि अनुसन्धान र उनीहरूले गरेका फैसला अध्ययनपछि दोषी पाइएकाले पदमुक्त गर्ने सिफारिस गरिएको परिषदले जनाएको छ।
नवलपरासीका अन्सारी २९ पुस ०७३ मा उच्च अदालतको न्यायाधीश नियुक्त भएका थिए। यस्तै, रुकुमका शाह २६ साउन ०४३ मा न्याय सेवा प्रवेश गरेर २३ भदौ ०६६ मा जिल्ला न्यायाधीश नियुक्त भएका थिए।
यस्तै, परिषद्ले उच्च अदालत तुलसीपुरकी न्यायाधीश बबिता उप्रेतीलाई सचेत गराउने निर्णय गरेको छ। उनले गरेका फैसला अध्ययनपछि कार्यक्षमता अभावमा उनलाई सचेत गराउने निर्णय गरिएको परिषदले जनाएको छ। काठमाडौंकी उप्रेती २९ पुस ०७३ मा उच्च अदालतको न्यायाधीश नियुक्त भएकी थिइन्।
यसअघि परिषद्ले उच्च अदालत तुलसीपुरको बुटवल इजलासकी न्यायाधीश रेणुका साहलाई बर्खास्त गरेको थियो।
