काठमाडौं- नेपाल राष्ट्र बैंकका गभर्नर महाप्रसाद अधिकारीविरुद्ध माओवादी केन्द्रको भातृ संगठन वाईसीएलले अख्तियारमा उजुरी दिएको छ।
राजनीतिक दलका सदस्य वा पदाधिकारी राष्ट्र बैंकको गभर्नर, डेपुटी गभर्नर तथा सञ्चालक पदमा नियुक्त हुन योग्य नहुने राष्ट्र बैंक ऐनविपरीत उनी गभर्नरमा नियुक्त भएको दाबी गर्दै वाईसीएलले उनीमाथि कारवाही माग गरेको छ।
‘राष्ट्र बैंकको स्वायत्तता, गभर्नरको जवाफदेहिता र देशको मौद्रिक नीतिको संवेदनशीलतामाथि गम्भीर प्रश्न उठेको तथा राज्यलाई गम्भीर हानी नोक्सानी पुग्ने खतरा देखिएकाले आवश्यक छानविन गरी भ्रष्टाचार कसुरमा अधिकारीमाथि कारवाही होस्,’ वाईसीएलको उजुरीमा उल्लेख छ।
यस्तै, अधिकारीले आफ्नो शैक्षिक योग्यता ढाँटेर राष्ट्रसेवक भई कसुर गरेको दाबी पनि वाईसीएलले गरेको छ।
