वासिङ्टन- अमेरिकाले चीनलाई घेरामा पार्न नयाँ रणनीति सार्वजनिक गरेको छ। त्यही नयाँ रणनीतिका रूपमा हालसम्म अमेरिकाले वास्ता नगरेका एसिया प्रशान्त क्षेत्रका मुलुकमा दूतावास खोलेर चिनियाँ गतिविधि निगरानीमा राख्ने तयारी थालेको छ।
अमेरिकाले दक्षिण प्रशान्त क्षेत्रका मुलुक टोंगा र किरिबाटीमा नयाँ कन्सुलेट खोल्दैछ। त्यस क्षेत्रमा चीनको बढ्दो प्रभाव रोक्न अमेरिकाले ती मुलुकमा कन्सुलेट खोल्न लागेको हो।
दक्षिण प्रशान्त क्षेत्रकै सोलोमन द्विपमा यसअघि बन्द गरेको दूतावास पुनः खोल्ने घोषणा पनि अमेरिकाले गरेको छ। चीनले हालै सोलोमनसँग सुरक्षा सम्झौता गरेको थियो।
प्रशान्त क्षेत्रका नेताहरूसँगको बैठकमा अमेरिकी उपराष्ट्रपति कमला ह्यारिसले यो घोषणा गरेकी हुन्। हालसम्म अमेरिकी प्रशासनले पटक्कै महत्त्व नदिएको यस इलाकामा उपस्थिति बढाउने रणनीति रहेको ह्यारिसले बताइन्।
