कोलम्बो- चरम आर्थिक र राजनीतिक संकटमा जेलिएको श्रीलंकामा संकटकाल घोषणा भएको छ।
प्रधानमन्त्री रनिल बिक्रमासिंघेले मुलुकमा संकटकाल घोषणा गरेका हुन्। राष्ट्रपति गोटाबाया राजापाक्षे देश छाडेर भागेपछि प्रधानमन्त्री बिक्रमासिंघेले संकटकाल घोषणा गरेका हुन्। राष्ट्रपति राजापाक्षे सैन्य विमानमा चढेर माल्दिभ्स पुगेका छन्।
सरकारविरोधी प्रदर्शनकारीहरूले प्रधानमन्त्री बिक्रमासिंघेको पनि राजीनामा मागेका छन्। उनको राजीनामा माग गर्दै हजारौं प्रदर्शनकारी प्रधानमन्त्री कार्यालयतर्फ बढेका छन्।
फ्लावर रोडस्थित प्रधानमन्त्री कार्यालय कोलम्बोको मुख्य कैन्द्रबाट करिब २० मिनट पैदल दूरीमा पर्छ।
प्रधानमन्त्री बिक्रमासिंघेले सर्वदलीय सरकार बनेपछि राजीनामा दिने बताइसकेका छन्। तर, प्रदर्शनकारीहरूले तत्काल पदत्याग गर्न माग गरिरहेका छन्। श्रीलंकाको संविधानअनुसार राष्ट्रपतिले देश छाडेर भागेपछि प्रधानमन्त्री ३० दिनसम्म स्वतः कार्यवाहक राष्ट्रपति बन्छन्।
राष्ट्रपति र प्रधानमन्त्री दुवैको राजीनामा नआएमा संसद र अन्य सरकारी भवन कब्जा लिने चेतावनी प्रदर्शनकारीले दिएका छन्।
