काठमाडौं- जसपाका ४० प्रतिशतभन्दा बढी सदस्यले आफ्नो पक्षमा हस्ताक्षर गरेको संघीय परिषद अध्यक्ष डा. बाबुराम भट्टराई पक्षले दाबी गरेको छ।
मंगलबारदेखि काठमाडौंमा शुरु भएको बैठकमा २३५ जना केन्द्रीय सदस्यले हस्ताक्षर गरेको डा. भट्टराई पक्षका नेता उमेश साहले बताए। यो संख्या अझै बढ्नसक्ने उनको भनाइ छ।
उनको दाबीअनुसार दिउँसो ३ बजेसम्म संघीय परिषदबाहेक २३५ जना केन्द्रीय सदस्यले हस्ताक्षर गरेका छन्। ‘अरू साथीहरू आउने क्रम जारी छ, संख्या बढ्नसक्छ,’ उनले भने।
यो संख्या जसपाका कुल केन्द्रीय सदस्यमध्ये करिब ४७ प्रतिशत हुन आउँछ। उक्त पार्टीमा ४९९ जना केन्द्रीय सदस्य छन्।
विस्तारित बैठकमा उपस्थित केन्द्रीय सदस्यहरूको हस्ताक्षर निर्वाचन आयोगमा बुझाउने तयारी बाबुराम पक्षको छ।
दल विभाजनका लागि संसदीय दल र केन्द्रीय समिति दुवैमा ४०-४० प्रतिशत पुर्याउनुपर्ने राजनीतिक दलसम्बन्धी ऐनको व्यवस्था छ। आफ्नो भेलामा पार्टीका २१ मध्ये १० सांसद उपस्थित रहेको बाबुराम पक्षको दाबी छ।
उक्त पक्षको दाबी सही भएमा पार्टी विभाजनका लागि कानूनी आधार तयार हुनेछ। तथापि, बाबुराम पक्षको भेलामा उनीसहित अर्का सांसद महिन्द्र राय मात्र देखिएका छन्।
जसपा अध्यक्ष उपेन्द्र यादव पक्षले पनि बुधबारदेखि वीरगञ्जमा केन्द्रीय समिति बैठक बोलाएको छ। दुई अलग भेलाबाट उक्त पार्टी विभाजनको रेखा कोरिएको छ।
