काठमाडौं- पदभार सम्हाले लगत्तैदेखि धरानका मेयर हर्क साम्पाङ एक्सनमा छन्। कहिले पानीको मुहान त कहिले सडक सरसफाइमा देखिने गरेका उनले खानेपानीको मुहानमै नगर प्रहरीको बिट राखेर अर्को एक्सन देखाएका छन्।
धरान-भेडेटार सडकको आँपगाछी क्षेत्रस्थित खानेपानी मुहान सुरक्षाका लागि उनले नगर प्रहरीको बिट खडा गरिदिएका हुन्।
सर्दुखोलाको शीरस्थित पानीको मुहानमा अत्यधिक फोहोर हुने गरेको जनगुनासोपछि उनले प्रहरीको बिट नै खडा गरिदिएका छन्। नगर प्रहरीलाई नेपाल प्रहरीको टोलीले पनि सहयोग गर्ने भएको छ।
नगर र नेपाल प्रहरीको टोलीलाई मुहान संरक्षणका लागि घामपानीले अवरोध गरेपछि मेयर साम्पाङले बिट स्थापना गराएका हुन्। मुहान क्षेत्रमा कोशी राजमार्गमा आउजाउ गर्ने यात्रीले शौच गर्दै आएका थिए। त्यसलाई रोक्न मेयर साम्पाङले प्रहरी परिचालन गरेका हुन्। अहिले दैनिक ६ सुरक्षाकर्मीले त्यस क्षेत्रमा पहरा दिइरहेका छन्।