काठमाडौँ । एमालेका पार्टी अध्यक्ष केपी शर्मा ओलीको गृह जिल्ला झापाको मेचीनगर नगरपालिकाका डिल्लीराम घिमिरेले रुँदै एमाले छाडेका छन् । ३१ वर्षदेखि पार्टीको काममा खटिदै आएका उनले आफू मेयरको उम्मेदवार सिफारिसमा नपरेको भन्दै रुँदै पार्टी छाडेका हुन् ।

मेची नगरमा पत्रकार सम्मेलन गर्दै उनले सहकर्मीहरूले आफूलाई बारम्बार अन्याय गरेको आरोप लगाए । उनले बाँकी जीवन स्वतन्त्र भएर बाँच्ने बताएका थिए ।

‘३१ वर्षअघि पार्टी सदस्य प्राप्त गरेँ, निरन्तर एमालेको इमान्दार कार्यकर्ता भएर काम गरेँ,’ उनले भने, ‘तर, पार्टीका केही नेताले मेरो अवमूल्यन गरी मेरो अवसरबाट बञ्चित गरिरहे ।’

पत्रकार सम्मेलनमा रुँदै उनले आगाडि थपे, ‘मलाई पार्टीका नेताहरूले रुहाउँदै रुहाउँदै निष्काशन गरे, म आफैँ निस्किएको हैन, मलाई निक्लिन बाध्य बनाए ।’

उनले पार्टीमा जीवन बिताएपछि अवसरको आशा गर्नु स्वभाविक भएको बताउँदे उनले भने, ‘आदरणीय मेरा सहयोगी मित्रहरू पटकपटक ममाथि भएको अन्याय सहन सकिनँ, एउटैलाई थपीथपी जिम्मेवारी र अरुलाई अवसरबाट बञ्चित गर्ने चरम गुडबन्दीका नाइकेहरुसँग बसेर पटकपटक अन्याय सहनुभन्दा स्वतन्त्र जिवन जिउनु उचित ठानेको छु, आजकै मितिबाट नेकपा एमालेको सम्पूर्ण जिम्मेवारीबाट बिदा लिएँ, मलाई माया गर्नु हुने सम्पुर्ण मित्रहरूसँग क्षमा चाहन्छु ।’

यसअघि उनी कुनै पनि अवस्थामा एमाले फुट्नु हुँदैन भन्दै वकालत गर्दै अएका थिए ।